16 de junho de 2010

Paixarico, rico-rico




















Paixarico, rico-rico
Ten ne l bico, bico-bico
L filico, lico-lico
De l saquito, quito-quito
Dun xazico, zico-zico

Mas p’ra quien ye…

Esse filico, lico-lico
De l saquito, quito- quito
De l xazico, zico-zico
Que ten ne l bico, bico-bico
Esse paixarico, rico-rico ?!!

Ye pal pai, pai-pai
desse paixarico, rico-rico
que gusta de xá, xá-xá
un xázico, zico-zico...

L pai desse PAI-XA-RICO !

14 de junho de 2010

L baso de las palabras


Pintura de Manuol Bandarra (2002)



Ten un cheiro a albricoque
talbeç a doces, quien sabe?!
Se l’anroscas queda un roque
só nun bolso grande cabe.

Guarda segredos, tesouros,
guapas cuontas de piratas,
cunta la stória de ls mouros
anda sin que tenga patas.

Se l aire bate nas fuolhas
parece que quier bolar
Sues palabras son las scuolhas
que mos pónen a sonhar.

Tamien tu puodes scolher
las palabras cumo froles
i l baso pa las poner
ye un libro cheno d’oulores.

13 de junho de 2010

Tamien you querie


Tamien you querie,
un die...

apanhar un barco grande
cruzar l mar ouceano
ber gaibotas i albatrozes,
ilhas i cidades,
giente çcunhecida,
oubir lhénguas i palabras
que nunca daprendi…

Mas quando ? Mas quando ?

I se manhana fusse…
precisamente esse die ?!



10 de junho de 2010

Ua bida de margarida

Margarida, Mie Amiga,
nun amarga la tue bida
cumo la mie, la mie bida !

Mas sabes alhá, querida ?!
Tamien amarga la mie bida,
la mie bida de margarida !

9 de junho de 2010

TRÉS BIBAS AL SPEILHO



Trés bibas al miu speilho
Trés bibas you l dou
Trés bibas porque me amostra
Tal qual cumo you sou.

Miesmo assi nun acredito
I a mira-lo you bou
I inda quedo a rezungar
Mira speilho, que nun sou you.

Nun beis que you nun sou esse
La mie marrafa era pimpona
I esse que tu m´amostras
Stá todo pelado de la mona.

You nun tengo angurrias
Speilho para que me tentas
I esse que tenes tu ende
Ten angurrias nas bentas.

I l speilho sien dezier nada
Inda me bolbiu a tentar
Mira bien que sós tu
Nun hai nada que anganhar.

Anton anchime de curaige
I pal speilho you mirei
I bien bi que era you
Mas miesmo assi nun acreditei.

Speilho miu speilho miu
Trés bibas te quiero you dar
You querie ser outra cousa
Mas tu, nun te deixes-te anganhar.

José António Esteves

8 de junho de 2010

Un bichá que bebie xá !


Bi un bichá
que bebie xá
i bibie
esse bichá
que bebie xá…

Un bichá
que bebie xá… ?
Tamien you sei
yá quantá !
Tu sabes alhá !

7 de junho de 2010

UA ROSA NE L MIU JARDIN



Hai ua rosa tan guapa
Ne l meio de l miu jardin
Dessa rosa cuido you
Quien ye que cuidará de mi?

A la purmanhana zabrochou
A la tarde fui scuolhida
Para de nuite ser lhebada
De presente pa la mie amiga

Feliç de quien possui
Ua rosa an sou jardin
La mie amiga cun certeza
Piensa agora mais an mi

Quando sopra l bento friu
I l Eimbierno gela l jardin
You tengo calhor an casa
I quedo calantico assi

Feliç de quien ten l sou telhado
Para ajudar la sua amiga, por fin
A fugir de l bento ruin
Que deixa gilado l jardin

José António Esteves

6 de junho de 2010

Un die, un die, un die…!



Cumo falar de l bien-te-bi ?
Esse paixarico nunca l bi !
Será parecido cul sabiá,
un que nun beio yá quantá ?

Será, será, será…
parecido cul sabiá ?

You bien querie, querie
ber-te un die, bien-te-bi
nó eiqui, mas alhá
ne l paíç d’Iemanjá.

Un die, un die, un die… !

Será, será, será… ?


sabiá

Quien yá sabie
que este eiqui
ye un sabiá,
mas alhá, alhá, alhá…
ne l paíç de Iemanjá ?

Sabiá,
canta alhá !

Si senhor!
Cumo un reissenhor
al lhado dua flor!



3 de junho de 2010

Adonde stá l bichá?

Pintura de Manul Bandarra (2002)



Por adonde andará
l bichá,
que nun l beio por alhá?

Parece nome de bicho,
mas un bicho nun ten bico.

Angulhe moscos,
burricos foscos:

faç de la pata un palico
pa tirar ua ala de l bico.

Dá bolos mui pequeinhos
ne l aire a fazer deseinhos;

canta bich! bich! cua risica
als saltos na silbeirica.

Yá nun beio, por alhá,
l bichá.
Por adonde andará?

1 de junho de 2010

Poluiçon


Cumo m’amanho
you, l pelicanho,
a partir deste anho,
pra tomar banho,
- un bun banho ! -
se hai cada canho,
canho amaricano
i de que tamanho,
que causa tanto danho
ne l grande ouceano ?!

Á BP, se t’apanho
!