l bolo de l beiso

La fantasie de l Natal

2011-12-12T10:42:00.002Z

L sprito festibo de la temporada de Natal nun puode muorrir-se por bias seia de l que fur.

Ten que haber siempre algue andrentro de cada un de nós, fuorças, motibaçones para pormober i eilebar esta quadra natalícia, nun solo pa ls ninos i ninas, ls mais pequeinhos, que míran i acradítan que ye neste tiempo que l nino Jasus pon ne l çapatico ou l pai-natal trai ne l saco las mais deseadas cousas queilhes mais quieren, mas tamien ls mais crecidos ténen que arranjar fuorças para nun se deixar bencir pulas remordidelas de la bida que mos metiu ne ls redadeiros tiempos.

Nun ye squecir-los, poner-los para atrás de las cuostas, naide resolbe nada squecindo seia l que fur muito menos aqueilho que ten que ser resolbido para nuosso bien de ls nuossos i de todos, até que hai bida para alhá de l Natal, mas mesmo que isto seia cumbersa feita, esta temporada festiba debe ser aporbeitada para fortalecer l’ounion de la família, tantas bezes doliente por bias de nun haber muita pacéncia para atamar las canseiras de l die a die, que mos chégan pul anfernizamiento i males dun goberno ou de la ganáncia que mos arrodeia, la falta de stima que ténen por nós.

L sprito natalício, ne l que toca als mais nuobos (aqueilhes qu’inda acradítan) dá uas buonas upas na sue formaçon psicológica i mental, dízen-lo ls specialistas, i you i la maiorie acradita i antende, que esta ambolbéncia amistosa de la fiesta de la comemoraçon de nacimiento de l Nino Jasus yé carinosa l bastante para anchir ls pequeinhos de felcidade. Assi sendo serie mui malo nun fazer i armar todo l que cuidarmos ser amportante an nuossas casas, eigreijas ou spácios públicos cun aluson l fato.

I para que esse sprito de pureza, bundade, simplecidade, hounestidade, de melhores modos chegue ls ninos i ninas, l mais de las bezes até nien ye perciso tener muito, i bibir atolhado de bienes, todo se puode fazer a la medida de l que podemos, puis to ls sabemos que l crecimiento i zambolbimiento deste tesouros se fai to ls dies, cul acunchego i l sustento que le damos siempre.
I quanto mais rial fur l Natal mais fácele será splicar todo, seia el d’abundáncia seia el mais ancolhido.

Nun me lhembro de l que recebie ne ls natales quando era garoto, hai sessenta anhos datrás éran na berdade outros tiempos, mas tamien nun tengo lhembránçias malas, sei que se botaba mais fé nas manifestaçones religiosas, l serano até la missa de l galho que era a meia-nuite, l beijar de l nino, la sagrada família, i sei que nesses dies habie muita fartura de quemer, la mesa staba siempre chena de cousas buonas i gustosas, ambora la bida que bibien ls mius nun fusse nanhun cielo na tierra, fui un nino feliç.

Para fazer la felcidade de ls ninos i de ls outros até nien ye perciso muito.

Buonas fiesta para todos, bamos fazer deste Natal un repiquete para las nuossas bidas.

Un diospiro

2011-11-22T21:29:00.002Z

Ua cuonta debie de siempre ampeçar por, era ua beç.

Nun me ampeces la cuonta por, era ua beç! Tu nun antendes l miu bibir… Ye que me parece que ancomeçando assi la mie cuonta you yá starei muorto. Inda nun stou i tu sabes esso bien que to ls dies me spreitas a ber se yá tengo l ambeligo meio sparrufado. Mira que para ser doce i nun ser carraspudo tengo que star quaijeque sparrufado… Yá tembrei bien bezes cun l miedo que me scochasses, tu que sós tan lhambisqueira!

Bá anton! Si te bou a fazer la buntade…

...staba berde i relhamposo l diospireiro, tiempo de fuorça i de auga a berbulhar ne ls tuoros i belheza nas fuolhas. An menos de nada anchiu-se de flores, uas flores que parece que naide dá por eilhas, pouca quelor, pétalas sumidas. Se nun fura yá un cierto belume ambaixo, a asparecé-se a fruito, podie-se dezir que eram fuolhas mal paridas, angurrefitadas, a salir de ls galhos.

Debrebe l diospireiro se anchiu de pequeinhas belhoticas presas por un turico registente. Mas ne l meio daqueilhes fruitos todos, uns a caer pa l chano, outros a registíren que nien heiróis, hoube ua florica que se atrasou, ampuxou un fruito a la sue borda i, al fin, naciu fuora de tiempo, mui tardeguita.

Chega-te parende diospiro eigoísta, deixa-me campo que tamien you quiero medrar! Hei-de fazer-me cumo tu, puodes screbir esto no cielo que miramos deiqui d´ambaixo, dezie la florica yá a querer ser algo mais.

Assi fui! Medrou!

Sue mai anterrou mais ua raiç, botou mais uns filicos puls terrenos regados para dende sorber auga i, al galho adonde staba l diospirico fui dando siempre mais ua pinguita de quemida.

Uas fuolhas ampeçórun a caer a fin de berano. Quando se pensaba que l diospireiro se iba a çpir i amostrar to ls fruitos, l outonho fui sendo amigo, las fuolhas mantebírun-se berdes i relhamposas, ls fruitos fúrun amadurando pa la buona suorte de la famílhia i de ls bezinos.

Stá agora toda quelor de ouro i, bonda un airico lhebe pa las fuolhas se botáren zamparadas uas atrás las outras.

L diospirico, solo l chamo assi por carino, porque el, anque tardiego, ye un fruito porfeito i stá alhá solico, cun la cisca a chegá-le de to ls lhados, nua altura de l anho an que ye cousa mais que normal las fuolhas cobríren l chano i ls diospiros stáren que nien sentinelas a ber quien passa i, quien passa a quedar cun la baba a salir de la boca solo de eimaginar la doçura.

Á tu!, dixo-me el onte a la nuite: Sinto-me tan solico i tengo tanto friu! Tapa-me para ber se nun me caio antes que chegue l Natal! Apuis, an beç de anfeitares l pinho cun las bumbilhas i fiticas queloridas, podies anfeitar a mie mai que siempre habie de calcer algo i you até podie ser la streilha qu´há-de lhebar l Natal pal tou huorto.

Stá bien, respundi-le you. Serás la mie streilha de Natal i la doçura para ancomeçar l nuobo anho.

Assi tu aguantes la trebuada d´hoije i la airaçada a traer graniço…

Assi tu aguantes, fui you rezungando quando iba a saber dua saca de lhana!…

A las onze

2011-11-10T16:13:00.009Z

Nun ye d’ouro
nien de prata
l miu reloijo…
mas de bronze !

A las onze
deste die onze
de l més númaro onze
deste anho de 2011 ...

I este poema
até cuntinarie
se houbisse
mais que dues palabras
acabadas an –onze …

Mas só hai dues
i nó onze!

Neste die onze!

N.B. Só manhana ye que será l die onze. Mas cumo nun sei adonde starei, a las onze, i cumo tamien yá hai por ende giente a dezir que manhana ye la fin de l mundo, só por ser l die onze… ! Beremos depuis… Depuis de l die onze !

L STUDANTE

2011-11-03T10:37:00.002Z

Sou studante a tiempo anteiro

Por isso tengo que studar

Para que ne l die de manhana

You nun tener de que me queixar.

Agora stou a ampeçar

Nua scuola muito amportante

A preparar-me pa la bida

Para ser un home brilhante.

Para ser un home brilhante

Isso ye mesmo berdade

Quien sabe se nun serei cura

Para mudar la houmanidade.

Por agora ye só studar

Aprendendo l que puodir aprender

Depuis ne l die de manhana

Que seia l que tenga que ser.

I há de ser bien cun certeza

Porque you bou-me a sforçar

I la mie scuola ye buona

Só bun resuoltado pude dar.

Esta scuola ye perfeita

I you bou apertar las botas

Para que ne l final de l anho

Me apareçan buonas notas.

La mie scuola ye tan querida

Porssores son de ls melhores

I you bou a dar l miu mássimo

Para tener ls sous lhoubores.

Un lhoubor cun buonas notas

Bou a dar l miu melhor

Para quando terminar ls studos

Puoder ser un bun doutor.

Ó quien sabe un angenheiro

Ó un cura, ó un porssor

Ó até un grande arquiteto

Para fazer prédios de balor.

Bou puorner l miu ampenho

Pa la profisson que seia

Para na bida que tubier

I steia you adonde steia.

Por isso bou a trabalhar

Oubedecendo ls porssores

Aprendendo todas las palabras

I cumbinando las quelores.

Ne l meio de puntos i birgulas

I até cun raízes quadradas

Bou fazendo las mies frases

De las formas mais bariadas.

Bou misturando la matemética

Cun un pouco de l pertuês

I tamien cu la region i moral

Junto Anglés, i tamien Mirandés.

Tamien na física i na química

I até an trabalhos de zeinho

Junto la de eiducaçon física

Pongo you todo l miu ampenho

Penso you que seia assi

I nun me puodo squecer

Que só fazendo assi

Serei aquilho que querie ser.

Por anquanto ye só studar

Studar i mais studar

Pois só studando muito

Ye que alhá puoderei chegar.

Tengo proua de ser studante

Siempre de cabeça lhebantada

Para que l die de manhana

Na bida nun me falte nada.

Por isso dou l miu melhor

No meio de alguns apiertos

Para deixar la bida de studante

Yá cu ls mius cursos cumpletos.

José António Esteves

Para matar la fame... i tamien la sede

2011-10-22T15:17:00.016+01:00

Un cachico de pan
pal miu Juan,
pan cun sardina
p'ra Adelina
i café de San Tomé
para mi, Jesé !

I queiso cun marmelada
para todos, Camarada !

EITERNAMENTE MAI

2011-10-10T15:38:00.002+01:00

Que na presença custante

Cousas buonas m´ansinou

I na pureza de l sou coraçon

Na bida siempre m´ambalou

Siempre ua mai carenhosa

Dels purmeiros passos que dei

Me ansinou cun carino

Las purmeiras falas que falei

De ls atos de cada silaba

Tou amor sien dimenson

Carinos me fúran dados

I bibidos cun eimoçon

De la cumbersa ne l huorto

I nel sou peito calcido

Ambalabas cul curaçon

Este tou felhico querido

Daquel abraço, daquel beiso

Inda guardo la lhembrança

Daquele tou gestio querido

Que trasmitiu tanta cunfiança

I me anspirou ne l caminar

Na mie bida a cada passo

Que inda hoije sinto la falta

Daquel tou gustoso abraço

I na persença de cada passo

Ancuntrei siempre ua fuonte

Por mais scuro que fusse l camino

Ancuntrabas siempre un hourizonte

Mulhier a quien debo la bida

I que merece todo l respeito

Cun gratidon i muito afeto

Me amaba de l mesmo jeito

I para todo quedar perfeito

Bai tamien l miu carino

I cun muita, i muita suidade

Un beisico deste tou mino.

José António Esteves

2011-09-09T10:32:00.001+01:00

Se hai cousas que a mi m’agrádan ye ls abanços que l mundo ten feito na tecnologie, i demos las buoltas que dirmos, hoije l mundo nun ye nien de acerca nien de loinge l que era quando you me criei, i inda bien, muito menos quando you criei la mie rapaza (hoije cun trés dúzias d’anhos d’eidade).

Dezido doutro modo, era un atraso de bida, criei-me nun tiempo an que la tecnologie ne l que toca a garoticos nun soubo mais nada que fazer a nun ser rachar las calças ne l culo, binte i quatro anhos apuis naciu la mie nina, i anton yá las cousas stában un cachico mais guapas, yá habie uns culeiros (fraldas) panhos que se lhabában, tenien uns zenhicos, i ls ninos yá se sentian bien arrumadicos sien tener eili nas partes ua jinela a recebir l aire a to la hora, que solo serbie para botar fuora l ampesteiro que salie de las tripas.

You lhembro-me cumo se fusse hoije, lhougo nas purmeiras besitas ne l spital, pedi a ua anferneira para m’ansinar a dobrar ls culeiros, que era an trés bicos i dun jeito para l alfinete dama nun picar la barriguita, porque sabie que quando benisse para casa era ua lhida tamien mie, demudar ls culeiros quendo stubissen çúzios.

Agora stou a cuntas cul miu nieto, durante l die, ten un anho, i el ye jogos de jogar i brincar por todo l que ye sítio de to las fuormas i feitios, ende stá la tecnologie, uns cun bruido outros cun botones i luzes, bonda el carregar nun botonito i yá l parro fai cuacua, carrega noutro i yá la corneta de ls bumbeiros toca, noutro fai l música de drumir, fálan pertués i anglés (alhá benirá l tiempo de haber berciones an mirandés, inda nun ye tarde) ne l que toca a culeiros, eilhes son bien purparados para nun deixar salir nada, son assi a modos de cerrona, nun ye perciso alfinete dama, eilhes agárran (cólan) adonde un quier, i nada de ls lhabar ye para botar fuora i se possible bien debreve.

Mas miu Dius, para un saber quando percísan de ser demudados, quando el yá fizo l serbício, se nun resmungar ou fazir mala cara inda ten que ser pul cheiro.
Ye causo para dezir, porra quando ye que la tecnologie ambenta un modo de poner un alarme ou ua lhuzica que seia para un saber quando stá na hora?

Até cuido quel agradecie, porque a las bezes ls crecidos, mesmo nun gustando de l fedor, lhíban tiempo a dar por eilha.

Quadras Als Santos Populares

2011-07-01T17:31:00.002+01:00

Durante l més de Junho

Houbo fiesta na mie scuola

Ne l arraial Mirandés

Nun ye perciso de la sacola

Pa la fiesta de la scuola

Traç buona sposiçon

Bais poular i beilar

I festejar l San. Juan

Ne l die de Santo. Antonho

Hai alegrie ne l aire

Que la fiesta ye d’arromba

Toda la giente bai a beilar

San. Juan ye nome de Santo

Muitos mais hai ne l altar

Mas por cierto este ye difrente

Ye amigo i ye popular

Santo Antonho, Santo Antonho

Que tens tu de special?

Só sei que na tue fiesta

Hai alegrie ne l arraial

Ne l die de Santo Antonho

Grande fiesta bai haber

Bou pa la fiesta a beilar

I pulas ruas bou a cuorrer

À miu rico Santo Antonho

Sós un Santo Popular

Na tue fiesta nun faltan

Sardinhas para s´assar

Al San. Juan i San. Pedro

Fago quadras cun rima

Mas al Santo Antonho nun l faltan

Ls bezinos acá de riba

L die de Santo Antonho

Ye un die mui popular

Na mie scuola por cierto

Todos l ban a recuordar

Este més na mie scuola

Ye un més d´animaçon

Bamos al Arraial Mirandés

Cun alegrie ne l coraçon

Que alegrie ye esta

Que paira na scuola anteira

Porque este die ye de fiesta

Brincamos a la ringalheira.

José António Esteves

Lar de San Jesé Bumioso

Poesie amerosa

2011-05-27T16:23:00.003+01:00

Oufreci-te un poema
Oufreci-te ua flor
Anque nun me chame Ema
Sei quien ye miu amor.

La poesie ye siempre assi :
bai i ben, hoije ou até outro die,
bola cumo un páixaro,
de mi para ti.

Mas l que you tamien desearie
ye que bolasse, bolasse si !
bolasse cumo un páixaro…
i nun me deixasse sien ti !

Roques

2011-04-29T15:37:00.006+01:00

Cula marifusa,
diusa ou até musa,
sei bien quien abusa
naqueilha tierra lusa !

You gusto ye de roques
i tamien d’albricoques,
mas se fur un resalgar…

Á mai, nun le toques !
Nien tocar, nien cheirar:
Puode até haber azar !

Grima !

2011-04-06T21:03:00.013+01:00

L que ban a comer ne l Japon
se deixar de haber peixes i pláncton
por bies dun acidente nuclear
porbocado pul home i nun só pul azar?

Sushis?
Durante inda quantos dies?
Atun?
Mas inda haberá algun ?

I Fukushima
cun que ye que rima?

Cun grima !
Cun grima !

Cumo tamien Hiroshima !

LAS BAQUITAS MIRANDESAS

2011-03-07T10:37:00.004Z

Stando you culas mies bacas

Ne l cerrado bien çcansado

I arreparei nua cousa

Qu´inda nunca habie reparado.

Bi que la Laranja, era castanha

Cul pelo bien relhamposo

I alhá andaba eilha

Cun aquel sou aire,meio manhoso

La Castanha tamien alhá staba

Que de castanha nun tenie nada

Era mais a dar al negro

I la marrafa que bien l quedaba

I arreparei que la Lhoura

Tamien nun tenie nada a ber

Tenie l pelo acastanhado

Cumo ua baca mirandesa debe tener

Mirei pa la Cordeira

I bi que de Cordeira nada habie

Que era ua baca bien grande

I pa l trabalho bien serbie

Arreparei na Andrina

Que staba mui alboroçada

I bi que staba touronda

I la Cereija neilha saltaba

Anton tube ua lhembrança

Nun sei cumo aquilho fui

I pus-me a magicar

Que tenie que la lhebar al bui

Que nien por artes mágicas

Benie un bui cerrado arriba

I fui adreitos a la andrina

I saltou-le lhougo para anrriba

Dous saltos bien atiçados

Purmeiro un i outro de seguida

Que deixórun la Andrina

Eilhi bien ancolhida

Nun fui perciso percurá-le

Se era assi qu´eilha querie

Porque l bui por anstinto

Sabie qu´era assi que se fazie

Arreparei para eilhas todas

I bi-le aqueilhas guedeilhas

Cumo bacas mirandesas

Tenien pildrengos nas oureilhas

Uas bacas marabelhosas

Que mos dában momentos belos

Mos dában l sou trabalho

I inda mos parien ls bitelos

José António Esteves

Lar de San Jesé Bumioso

Ls Retraticos son de la anternete

oubrigado a qien ls metiu alhá

L carro cun patas

2011-03-07T01:12:00.002Z

Pintura digital de Manuol Bandarra

Era un carro de que marca?

Iba tan cheno de palha

que parecie ua arca;

la frente era cabeznalha,

cun dues ruodras, uito patas,

setos, sobrado, cambones;

miaba cumo las gatas,

tenie moço, coucilhones,

un eixe antre antriteiras,

todo de trabas certeiras.

Fracisco Niebro

L squilo i l crocodilo

2011-02-01T14:56:00.002Z

Un squilo
anriba dun filo
i cun muito stilo :
quanto puode pesar ?

Tanto cumo un squilo
na mie tierra de l Pilo :
nien sequiera un quilo
se calhar !

I un crocodilo
que pesa mais dun quilo
a la borda de l Nilo :
l que puode caçar ?

Se calhar un squilo
a nun ser que cun stilo
desse crocodilo
se scapar…

Esse pobre squilo
de nien sequiera un quilo
i anriba dun filo…
Quien l puode amparar ?

(Screbido nestes dies cumo ls que stamos a bibir quando nesse grande paíç africano i tamien mediterránico que ye l Eigito, un pobo (un pobre squilo…) lhuita pula sue lhibardade i contra un ditador (l crocodilo…) que stá ne l poder, hai mais de 30 anhos.

UN SQUILO

2011-01-30T11:20:00.006Z

Hoije l pequeinho Sarafin,

brincalhon cumo siempre,

nun quijo fugir de mie

i brincou a la mie frente!

Miesmo quando queda queto

nun cunsigue scuonder

que ye malandro, i nun stá queto

mas tan debertido de se ser.

Brinca al sol arregalado

cóme i enche a barriguita,

a la nuite bei l cielo strelhado

a la puorta de sue casita.

Ne ls sous gestios angraçados,

nota-se tamanha cuntentaçon

i ls sous aires apalhaçados,

que aire de palhaço le dan!

Nun penses que al ancuntrar

un equilo a brincar na rue

que l cunsigues apanhar

se l pensares, ye eiluson tue.

Mas agarra na eiluson

de que tamien puodes brincar,

cumo este squilo brincalhon

que passa la bida a saltar.

Estes nun son mius, son de

Fernanda Rocha Mesquita

Andaba a spiolhar na anternet, i ancuntrei-los i gustei deilhes, i antandie que bós tamien gustariedes de ls ber. Anton traduzilos para mirandés, i eiqui stan. Cun Beisicos para todos. I beisicos tamien para

Fernanda Rocha Mesquita

Nun sei quien ye, i nien adonde stá, mas nun fai mal. Debe fazer parte deste mundo, i isso yá ye l suficiente. Oubrigado Fernanda por esta obra marabelhosa.

José António Esteves

Lar de San Jesé Bumioso

L peru

2010-12-09T22:07:00.008Z

Ah tu, ah tu, Marilu,
adonde stá l nuosso peru ?
An Itaipu, Caruaru,
Iguaçu, Ipu, Cururupu ?
Nun me digas que esso ye tabu
i que el até anda cun un tatu !

Pru, pru, pru, pru !
Adonde ye que habie de star l nuosso peru ??!!
Tampouco ne l Peru,
Tombuctu, Honolulu, Baku,
Malibu, Machu Picchu ou Kourou!
Mira a ber mas ye se stá...

Glu, glu, glu, glu...

NA RUE !
Ah tu, Marilu !

I Marilu pal sou peru :
Á miu peru, mais guapo que tu ?!
Pru, pru, pru, pru…
Só tu ! Só tu ! Á miu peru !

I l peru pa la sue Marilu :
Glu, glu, glu, glu...
Que guapa fala que ye la tue
Puis ye, puis ye, á Marilu !

SIN MIEDO DE SER FELIÇ

2010-10-12T11:42:00.002+01:00

Benie, crianças, benie a sunhar.

Benie sin miedo de bos anganhar.

Ne l cielo las streilhas stan andicar.

Benie, que la fiesta bai ampeçar!

Ne l azul de l cielo, stan a pisar.

Çapaticos de mil quelores.

L curaçon yá stá a saltitar.

Mostrando ls buossos balores

Benie que! La fiesta yá bai ampeçar!

Ls sunhos, bós puodeis maginar.

Que nesses sunhos que tubierdes

Zeijos, bós puodeis rializar.

Basta ls buossos curaçones querer.

I maginar palabricas!

Sereis ls caçadores de l lhuar.

Sereis ls fazedores de strelicas.

Sereis las sete quelores de l arco-íris.

Sereis ls pintores de l firmamiento!

Rapazas i rapazicos, benie.

Que Dius por bós, quedara cuntento.

Spalhai buossas alegries al aire.

Cantai, sous lhoubores al Senhor.

Çarandai, la alegrie de serdes felizes!

Que to bos será melhor.

Bibie cun amor, i paç, i harmonie.

Jogai sous sunhos al bento.

Salpicai de lhume ls caminos.

Gozai la felicidade de l mumento.

Sin miedo de seres feliç

Serás eiternamente criança,

Sunhando sunhos gustosos

Nesta bida todo s´alcança.

José António Esteves

La baca Paca

2010-09-24T18:30:00.017+01:00

La baca Paca
Yá partiu la staca
L que eilha quier
Ye bibir pacata.

Mas tamien dormir
Dentro dua maca
- Ua maca, giente,
Para ua baca ! –

I de l que gusta
Ye de usar bata
I de poner laca
Só cun ua pata.

Mas muita pataca
Essa baca saca
Pa que la patata
Saba cumo nata

Mas que naide se ria
ou la trate de macaca
Senó la dita baca
Lhougo s’aporcata:

" You ua macaca ?
dai-me cá ua matraca !
Ou tamien ua maraca !
You sou ua baca ! "

Mas un die, pula cierta,
yá se bai la nuossa baca...

I para adonde bai ?!
Para adonde bai la baca Paca ?!

Bai pa la Dinamarca !
Ye alhá que bibe Dina…
(Un segredo que nun se tapa...)

Dina...
(Que nun ye nada ua marca)
Mas que ye cumo eilha... ua baca !

Ua baca mesmo guapa,
Guapa cumo la nuossa baca,
La nuossa baca Paca !

Dai-le tamien ua capa !

Paixarico, rico-rico

2010-06-16T20:08:00.007+01:00

Paixarico, rico-rico
Ten ne l bico, bico-bico
L filico, lico-lico
De l saquito, quito-quito
Dun xazico, zico-zico

Mas p’ra quien ye…

Esse filico, lico-lico
De l saquito, quito- quito
De l xazico, zico-zico
Que ten ne l bico, bico-bico
Esse paixarico, rico-rico ?!!

Ye pal pai, pai-pai
desse paixarico, rico-rico
que gusta de xá, xá-xá
un xázico, zico-zico...

L pai desse PAI-XA-RICO !

L baso de las palabras

2010-06-14T00:55:00.003+01:00

Pintura de Manuol Bandarra (2002)

Ten un cheiro a albricoque
talbeç a doces, quien sabe?!
Se l’anroscas queda un roque
só nun bolso grande cabe.

Guarda segredos, tesouros,
guapas cuontas de piratas,
cunta la stória de ls mouros
anda sin que tenga patas.

Se l aire bate nas fuolhas
parece que quier bolar
Sues palabras son las scuolhas
que mos pónen a sonhar.

Tamien tu puodes scolher
las palabras cumo froles
i l baso pa las poner
ye un libro cheno d’oulores.

Tamien you querie

2010-06-13T22:10:00.002+01:00

Tamien you querie un die
Apanhar un barco grande
Cruzar l mar ouceano
Ber gaibotas i albatrozes
Ber ilhas, cidades,
Giente çcunhecida,
Oubir lhénguas i palabras
que nunca daprendi…

Mas quando ? Mas quando ?

I se manhana fusse…
precisamente esse die ?!

Ua bida de margarida

2010-06-10T19:13:00.003+01:00

Margarida, Mie Amiga,
nun amarga la tue bida
cumo la mie, la mie bida !

Mas sabes alhá, querida ?!
Tamien amarga la mie bida,
la mie bida de margarida !

TRÉS BIBAS AL SPEILHO

2010-06-09T21:57:00.002+01:00

Trés bibas al miu speilho

Trés bibas you l dou

Trés bibas porque me amostra

Tal qual cumo you sou.

Miesmo assi nun acredito

I a mira-lo you bou

I inda quedo a rezungar

Mira speilho, que nun sou you.

Nun beis que you nun sou esse

La mie marrafa era pimpona

I esse que tu m´amostras

Stá todo pelado de la mona.

You nun tengo angurrias

Speilho para que me tentas

I esse que tenes tu ende

Ten angurrias nas bentas.

I l speilho sien dezier nada

Inda me bolbiu a tentar

Mira bien que sós tu

Nun hai nada que anganhar.

Anton anchime de curaige

I pal speilho you mirei

I bien bi que era you

Mas miesmo assi nun acreditei.

Speilho miu speilho miu

Trés bibas te quiero you dar

You querie ser outra cousa

Mas tu, nun te deixes-te anganhar.

José António Esteves

Un bichá que bebie xá !

2010-06-08T20:54:00.002+01:00

Bi un bichá
que bebie xá
i bibie
esse bichá
que bebie xá…

Un bichá
que bebie xá… ?
Tamien you sei
yá quantá !
Tu sabes alhá !

UA ROSA NE L MIU JARDIN

2010-06-07T11:12:00.001+01:00

Hai ua rosa tan guapa

Ne l meio de l miu jardin

Dessa rosa cuido you

Quien ye que cuidará de mi?

A la purmanhana zabrochou

A la tarde fui scuolhida

Para de nuite ser lhebada

De presente pa la mie amiga

Feliç de quien possui

Ua rosa an sou jardin

La mie amiga cun certeza

Piensa agora mais an mi

Quando sopra l bento friu

I l Eimbierno gela l jardin

You tengo calhor an casa

I quedo calantico assi

Feliç de quien ten l sou telhado

Para ajudar la sua amiga, por fin

A fugir de l bento ruin

Que deixa gilado l jardin

José António Esteves

Un die, un die, un die…!

2010-06-06T18:03:00.005+01:00

Cumo falar de l bien-te-bi ?
Esse paixarico nunca l bi !
Será parecido cul sabiá,
un que nun beio yá quantá ?

Será, será, será…
parecido cul sabiá ?

You bien querie, querie
ber-te un die, bien-te-bi
nó eiqui, mas alhá
ne l paíç d’Iemanjá.

Un die, un die, un die… !

Será, será, será… ?

sabiá

2010-06-06T17:56:00.006+01:00

Quien yá sabie
que este eiqui
ye un sabiá,
mas alhá, alhá, alhá…
ne l paíç de Iemanjá ?

Sabiá,
canta alhá !

Si senhor!
Cumo un reissenhor
al lhado dua flor!

Adonde stá l bichá?

2010-06-03T02:25:00.003+01:00

Pintura de Manul Bandarra (2002)

Por adonde andará
l bichá,
que nun l beio por alhá?

Parece nome de bicho,
mas un bicho nun ten bico.

Angulhe moscos,
burricos foscos:

faç de la pata un palico
pa tirar ua ala de l bico.

Dá bolos mui pequeinhos
ne l aire a fazer deseinhos;

canta bich! bich! cua risica
als saltos na silbeirica.

Yá nun beio, por alhá,
l bichá.
Por adonde andará?

Poluiçon

2010-06-01T21:41:00.008+01:00

Cumo m’amanho
you, l pelicanho,
a partir deste anho,
pra tomar banho,
- un bun banho ! -
se hai cada canho,
canho amaricano
i de que tamanho,
que causa tanto danho
ne l grande ouceano ?!

Á BP, se t’apanho !

Catibar

2010-05-27T21:22:00.014+01:00

Staba Sol,
l tiempo caliente,
i bieno-me a ber,
talbeç sien el saber,
mirando pula jinela
de l miu scritório,
un lhagartico,
todo cumprido i de la quelor de las piedras…
« É uma lagartixa », dízen an pertués...
« C’est un petit lézard », dízen an francés,
« un lézard des murailles » !

Spreitou…
i inda tube tiempo de le preguntar :
L que quieres, lhagartico ?
Saber l que fago… ?
Saber l que scribo… ?
Mira, bou a screbir subre ti
i falar-te tamien,
se quejires,
doutro lhagarto,
un que passou,
tengo la certeza,
ua buona parte de la bida
- la sue bida de lhagarto ! -
oubindo falar mirandés
nua huorta a la borda de l riu Douro…
Nun sabes adonde queda esse riu ?
Mas para que bal la pena
star you a perder tiempo
a amostrar-te-lo nun mapa
se sei purfeitamente
que essa mie splicaçon
nun puode antressar un minuto
- un minuto que seia !-
un lhagarto cumo tu.
Sei bien mas ye
l que a ti t’antressa,
tu, que gustas de sol
i de piedras calientes…
Mas nun t’admires
se miro para ti
cun ganas de cumbersar,
an mirandés,
cumo puodes ber.
Debe de ser de família
esta manie
mas quedas a saber,
ye quaije un segredo :
Quando miu abó inda era bibo
nessa tal huorta a la borda desse riu
que ten un nome mas que a ti nun t’antressa,
un die, i acradito na pessona que me l cuntou,
un die, miu abó chegou a catibar un lhagarto…
Por esso yá sabes,
Se quejires, tu tamien…
You sou nieta del
i las tradiçones por bezes
dúran que you sei alhá !
Esta debe de ser ua
cun raízes mui antigas,
bielhas cumo l tiempo !
Resta a saber
an que lhéngua
bamos poder quemunicar
you i tu … ?

I an nien sequiera un segundo
cun uolhicos rápidos cumo la lhuç…

― Na lhéngua de l Sol,
de la calor de l Berano
i de las piedras calientes !,
respundiu sien sperar
i mirando siempre para mi
esse miu lhagartico.

I nisto…
Scapou-se !

― Lhagartico, responde-me outra beç !
Quando ye que te tornarei a ber ?
Cumigo nun cuorres perigo ningun
tal i qual, tengo la certeza,
l lhagarto de miu abó
que bibiu siempre feliç,
a la borda desse riu adonde
todos falában mirandés.
I cul tiempo…
quien sabe se nun daprendiu
el tamien
l nome desse riu… ?
Ye un nome que lhembraba
I inda lhembra a muitos
l Sol,
la calor de l Berano
i tamien…
las piedras calientes !
Esso de que tu gustas tanto
tal i qual, tengo la certeza,
l lhagarto de miu abó…

Un lhagarto que bibiu feliç
oubindo miu abó a la borda dun riu...
Miu abó i tamien outros
falar siempre Mirandés !

UA ROSA YE UN SUONHO

2010-03-17T20:06:00.004Z

Se ua rosa nun ambelhece

Alegra eilha un curaçon

Un curaçon, d´amor por eilha

I un deseio sien eiluson

Se ua rosa nun bibier

Boto lhágrimas ne l momento

Sou amor bou a perder

I esta bida, you lhamento

Se ua rosa churar

Sufrerei you sien pudor

Mas you nun bou a deixar

Cair lhágrimas al amor

Se ua rosa sunhar

Tengo ne l peito ua peixon

Que por eilha stá a saltar

Querendo-la perto de l curaçon

Se ua rosa por mi, fur beisada

Muita ternura bai a tener

Cumo ua mulhier, ye zeiada

Por un ser, que la bai a querer

José. A. Esteves

Fui assi

2010-02-05T23:28:00.014Z

Hoije l praino spertou cedo
I spertou an cunfuson
Que arranjarei para almuorço
Dixo l sapo quemilon

La ciguonha siempre mora
Nua casa bien arriba
La lhagona eilha splora
Siempre a cata de quemida

Deixa uobos no nial
Que ten stado a chocar
Para que naide l faga mal
Eilha nun puode tardar

Fui-se lhougo al ribeiro
A ber se achaba quemida
L sapo biu-la pormeiro
I metiu-se na guarida

Un i outro, dambos stában
Cun la barriga a dar horas
Querien ber se nun quedában
Sien almuorço, a desoras

Apuis chegou l coneilho
Que trazie ls pies cansados
Ua águila no sou reilho
Fui l cabo de ls trabalhos

Alhá se scapou por pouco
L cuitado biu-se mal
De tanto chiar stá rouco
De la fome yá bei mal

L rato andaba pulhi
Fui-se a meter no buraco
Cun la águila eiqui
Se nun me scondo, nun scapo!

La checharra yá cun calor
Inda se quijo assumar
Cumo naide l dá balor
Ancomeçou a cantar

A sbolaciar chegou
Ua boubielha guapica
Nien manginais cumo stou
Inda nun quemi nadica!

Assumou-se a la lhagona
A spreitar la libelinha
Mas eilha chena de ronha
Bolou que nien andorinha

Apuis de tán sfamiados
Yá se iban deixando cair
Fraquitos i zbotados
Nien sabien adonde ir

Anté que por fin chegou
Ua gralha spaborida
I cun boç fuorte boziou
Bamos a treminar la bida!

Cai eiqui, lhebanta eilhi
Fazírun ua reunion
Apuis la gralha dixo assi
Hai que haber ounion

Tenemos que trabalhar
Para cultibar la quemida
A arar i a scabar
I a tratar de la bida

I la checharra se cansou
De ser tán preguiceira
Bolou debrebe i scapou
A fazer pan na masseira

Diç la ciguonha de alas grandes
Aquestumada a restrolhos
Nun perciso que me mándades
Bou yá a fazer manolhos

Apuis falou l gabilan
Que staba todo catita
Ála todos a ganhar l pan
que l trabalho denifica

Apuis disso nunca más
Naide comiu l bezino
Fázen fiestas i arraiales
An alegrie sien tino

ADEBINHAS

2010-01-21T11:00:00.004Z

Bamos a las adebinhas

quien sabe estas

Stá an Lisboua i nun stá an Pertual

Stá an Paris i nun stá an França

Stá an Spanha i nun stá na Ouropa

Stá na Asia i nun stá na China

Quei ye

Sou un rapaç sin marrafa, bibo nua casa sin teilha

Para antrar i salier, ten que ser siemore de sgueilha

Quien sou

Somos dues armanas

Bibimos cun dues amigas

Só chicha cun uossos

Metemos nas nuossas barrigas

Bá! Agora toca pensar

ancuntrai la respuosta

eilha stá porqui.

José António Esteves

Anton yá çcubriestes las respuostas

eilhas staban eiqui al lhado

Mas se nun las ancuntrestes

eilhas eiqui ban.

1 ye la letra S.

2 ye un buoton.

3 son las meias.

Até outra beç

José António Esteves

LS MINTIROSOS

2010-01-07T11:25:00.003Z

Era tiempo de caça, i staban dous tius ne l,” NET BAR L ESTEVES“, sentados a ua mesa a buer uas cerbeijas i dezie un deilhes you yá ua beç matei dues perdizes dun tiro, i dixo l outro mui

d´agudo bó, isso nun ye nada you staba ua beç anriba dun carbalho i só dun tiro matei dues lhiebres i un coneilho, fui ua buona caçada dixo l amigo, mas nun quieres Saber que you l´anho passado, staba tamien na spera anriba dun carbalho i matei trés cochinicos brabos yá bien grandicos só cun tiro. La cumbersa seguiu siempre un matando mais que l outro. Até que outro tiu que staba noutra mesa fui a tener cun eilhes i dixo. Isso nun ye nada amigos, you ua beç só dun tiro matei dous cochinos yá grandes trés coneilhos i ua raposa i inda l dei de raspon a ua lhiebre Quedórun ls dous de boca abierta!. Bó! Tamien sodes caçador, dezierun ls dous a la ua.

Nun senhor dixo l tiu. Mas tamien sou mintiroso.

José António Esteves

BUONAS FIESTAS

2009-12-25T20:32:00.004Z

You sou l tiu Jantonho

I nun me lhebeis a mal

Que hoije you bos deseie

Un Santo i feliç Natal.

Beisicos

José António Esteves

LA CANHONA MUORTA

2009-12-22T20:05:00.005Z

La muorta bai culas outras?,

Pregunta-le Manolico al pai.

Deixa-la ficar cuitadica,

Qu´eilha hoige nun bai.

Lhougo la respuosta pronta:

Eilha anda un pouco azarada:

Hoige fica por mie cuonta,

You la lhiebo pa la cebada.

Senão boto-le un galho,

S´acaso l quejir rober

I s´eilha nun l quejir

Yá beio l que fazer.

L rapaç nun se cunformou

Cula respuosta de l pai

I bolbiu a perguntar;

Anton eilha fica ou bai?

L pai yá anfadado

Dou-le ua respuosta meio tuorta;

Bai tu atrás de las bibas

Que you cuido de la muorta.

You bou, mas sei bien

Qu´eilha buona nun fica,

A mi dá-me tanta pena

De la ber assi cuitadica!

Stá bien nun t´aflijas

Lhougo lhougo ficará bien:

S´a ti te dá tanta pena

A mi me dá pena tamien.

Mas agora fica çcansado

You cuidarei de la muorta,

Berás que an beniendo

Eilha stará a la puorta.

José António Esteves

La lhebrica na nebada

2009-12-18T21:43:00.005Z

La niebe bieno
I bieno a muntónes
Ls coneilhos quedúrun
Chenos de cunfusónes

Quedórun ls coneilhos
I las lhiebres tamien
Quedában ancandiladas
Sien saber l que fazien

La lhebrica pequeinha
Fui-se eilha solica
Perdiu-se de la mai
I nun bei nadica

La lhuç de la niebe
Stá a ancandilá-la
Yá boziou i todo
E nun l baliu de nada

A querer fugir
Sbarrou nun talabanco
Como ye qu´ hei-de ir
Se stá todo tan branco

Yá zasperada
Tornou a boziar
Ah maizica amada
Beni-me a achar

Anté que pal chano
Mirou assustada
I alhá na niebe
Biu ua pisagada

Era de sue mai
Debrebe la coinciu
Corriu i seguiu-la
I si la çcubriu

Mas assí i todo
Eilha iba assustada
I la mai de percurar
Yá staba mui cansada

Cansada i anraibada
Cun la sue lhebrica
Que sien l dezir nada
L fugiu solica

La mai quedou feliç
Mas percurou-l assí:
Porquei fugiste
De l pie de mi?

Nun bés que nun puodes
Tu sola scapar
Agora stás de castigo
I bás-te a deitar

La lhebrica deitou-se
Fizo l que la mai mandou
I quedou mui triste
Porque nun brincou

Las amigas stában
Todas a jogar
A oubi-las dezie
Nun me torno a scapar

LA MAGOA DE LA RITA

2009-12-16T21:24:00.003Z

Tengo ua magoa cumigo

Eiqui drento de l miu peito

Porque beio cun tristeza

Que naide me ten respeito

A las bezes la mie mestra

Quando stá ampertinente

Diç-me assi, oh! Garota

Tamien yá quieres ser giente

Outras bezes an cumbersa

Quiero meter l guedelho

Bózia lhougo mie mai

Calha-te alhá sou fedeilho

Manda-me calhar l bico

Que baia tratar doutro ouficio

Ls mius armanos dizan a rir

Yá quier dar leis, houspício

Miu pai que bien cunheço

Que sou muito sue amiga

Tamien nun poupa a dezier

Yá ten catárro la furmiga

I la criada de la casa

Que grande raiba me mete

Nunca me chama senhora

Ye, siempre sou pibete

Por isso you m´anraibo

Ando nun nerboso cunstante

Anton para se ser giente

Ye perciso ser gigante

Ensinórum-me uas ties

Quando falaba cun eilhas

Que nun se medie l burro

Pulas sues grandes ourelhas

Sou pequeinha si, mas sou giente

Nun sou houspício,,nien pirralho

Sou giente, bós bien bedes

Yá bos mostrei quanto balho

José António Esteves

CAÇADA EIMAGINADA

2009-12-13T10:55:00.006Z

Fui a caça cul miu galgo

Un perro mui legeiro

Lhebei mas dous perros

L conelheiro i perdigueiro.

Saltou-me lhougo ua lhiebre

Çque cheguei a cabeço almouro

Caiu redondica ne l chano

Lhougo al purmeiro stouro.

Mas alantre un cibico

Saliu-me un jabali

Só apenas cun dous tiros

Standiu-se lhougo eilhi.

Segui puoli arriba

Lhebantou-se ua perdiç

Cun só tiro la matei

Fui la caçada que fiç.

Anduobe puoli a las buoltas

Spantou-se ua galinhola

Nun fui capaç de la matar

Porque s´ancrabou ua mola.

Inda saliu un coneilho

Mas depriessa se scapou

Nun fui capaç de la tirar

La spingarda s´ancrabou.

Segui puoli abaixo

Cula spingarda bien dreita

Bou mas ye para casa

Que la caçada stá feita.

Nun cacei grande cousa

Cumo aquel que diç

Siempre ye un jabali

Mais la lhiebre i la perdiç.

José António Esteves

L gato Farruscas

2009-12-13T01:06:00.006Z

Le gato Farruscas
Ye un gato siamés
Anganha-se cun las pantufas
Calça-las d´alrobés

Ye mui branquito
Cun pelo pendado
A las bezes pón-l gel
Para andar lhebantado

Quando se assusta
Fai grande rebulhiço
Cun l pelo eiriçado
Parece un pelhiço

La mai de Martica
Un die dixo-l assi:
Trago-bos ua cumpanha
A ti i a Amélie

Bíben eilhes todos
Cun grande alegria
Respeito i amisade
An porfeita harmonia

Marta toca piano
Farruscas biola
Amélie canta
I beila eilha sola

Siempre leian un lhibro
Apuis de ciar
Porque todo mundo
Ten que studar

Jogan todos juntos
I bán a passear
Scríben no cumputador
Antes de se deitar

Apuis lhában ls dientes
Antes de ir pala cama
Dán un beisico
I dizen anté manhana

Bi ua rosa a nacer

2009-12-10T21:01:00.003Z

Bi ua rosa a nacer

I dei por mi a pensar:

Quien será l felhizardo,

Que la eirá a agarrar?

Tornei a passar pula rosa

I anton scuitei assi:

Quando bolbires a passar

Nun te çqueças de mi.

Anton birei-me para trás

I bi aqueilha belheza,

Agarrei-la cun muito amor

I lhebei-la pa la mie mesa

Pus-la nua jarrica cun auga

Bien ne l meio de la mesa

I to ls dies you bie

Aqueilha pura belheza

Fazimos-mos mui amigos

You i aqueilha frolzica,

Nun podie you passar

Sin ber la mie rosica.

Era ua frol mirandesa,

Cumo bós que stais por ende,

Las froles fálan cula giente,

La giente ye que nun las antende.

You si antendie la mie rosica,

Cun eilha to ls dies falaba,

Ua cumbersa animada

I eilha bien que gustaba.

Se podirdes, falai cun eilhas,

Ye un fabor que le fazeis,

Mas se nun quejirdes falar,

Pul menos nun las stragueis.

Nun bos custa nada tentar,

Solo para ber l que passa,

Bereis se falardes cun eilhas,

Cumo la cousa ten graça!

José António Esteves

L jogo de la scundelina

2009-12-10T09:59:00.010Z

Serie assi??!!
Nun tengo la certeza se esta lenga lenga era de la scundelina...

Tengo eideia que, para se jogar a la scundelina i para se saber quien se iba a scunder, ousábamos ua lenga lenga. Un garoto topaba no peito de cada un de ls restantes al mesmo tiempo que dezie cada palabra, assi:

Cerra l bico, bico, bico,
quien te dou tamanho bico?
Fui la galha chocalheira
q'anda alhá pula ribeira
a saber de uobos de perdiç,
para l filho de l juíç.

Barre, barre bien,
se barrires bien,
dou-te un bintén,
se barrires mal,
dou-te un rial.

Churro, murro, murro,
cabalhicos a correr,
qual será l purmeiro
que s'eirá a scunder.

La monica Amélie

2009-12-09T23:05:00.011Z

Martica ye ua nina
Que ten ua mona
Que se chama Amélie.
Ye guapa i fina
Cun uolhos azules
Cumo you nunca bi.

Quando Marquita
Fui pa la scuola
Deixou la monica
An casa, eilha sola.

Antes de salir
Dixo-le assi:
Quedas a jogar
Para te ambair
Que apuis
Torno para ti.

La monica jogou
Mas yá staba cansada
I fizo zeinhos
Anquanto speraba.

Quando Marta chegou
Fui-la lhougo a ber
I trouxe-le un lhibro
Pa l'ansinar a ler.

Apuis dixo-le:
L saber
Ten muito balor
Ben acá
Que te bou a ansinar
A outelizar
L cumputador

Nun quiero que el ouba

2009-12-08T15:07:00.004Z

Tiu Chancas era un lhabrador de ls mais ricos i mais afamados de Peinha Al Castro, un lhabrador de purmeira linha, até tenie un cabalho i todo! I que cabalho era l de tiu Chancas! Staba mui gordo, pus el trataba-lo de l melhor que habie i cun muita cerimónia i muita proua, daba-le de todo l quemido que l cabalho querie, nunca le faltou cul quemido al cabalho l tiu Chancas. Tamien quando l tiu Chancas percisaba de ir a algun sitio l cabalho staba siempre çponible. Mas l Chancas solo l lhebaba als sítios mais amportantes.
Anton, un die percisou de ir a Miranda i alhá fui cun sou cabalho bien ampimponado, que até lhebaba l'albarda nuoba i todo. Tamien lhebaba anriba l cabalho uas alforjas. Quando passou pul quartel de la guarda, yá an Miranda, biu un guarda que era sou amigo, cumprimentou-lo i l guarda aporbeitou para se meter un pouco cun tiu Chancas. I dixo-le:
- À tiu Chancas, que lhebais nessas alforjas?

Anton l Chancas zbiou-se un cachico de l cabalho i aprossimou-se de l guarda l mais que pudo i dixo-le mui baixico, quaije al oubido.

- Ye bena pa le dar al cabalho.
L guarda, admirado, preguntou-le:
- Mas porquei bós me dezis isso assi tan baixico, quaije an segredo?
- Çculpa-me, mas ye por mor de l cabalho, nun quiero que el ouba senó yá la quier agora...

José António Esteves

Analfabeto

2009-12-07T19:56:00.003Z

Un cergento diç para un recruta.
- Á recruta, di-me se sabes ler.
- You digo, miu sargento, screbir sei si senhor, agora quanto a ler nun pesco ua palabra.
-Ye de admirar!.... Bamos alhá a ber isso. Scribe nesta fuolha qualquier cousa.
L recruta screbiu uns gatafunhos. L sargento dixo:
-À sou animal! L que screbiste tu ende? Lei l que acabeste de screbir.
L recruta:
- Çculpai-me miu cergento, mas you yá l dixe que quanto a ler nun pescaba ua palabra...

José António Esteves

Hai uns anhos

2009-12-06T20:43:00.004Z

Hai uns anhos no Natal
Era l Nino Jasus solico
Que an beç de l Pai Natal
Ponie cousas no çapatico

Ls ninos deixában ls çapatos
De nuite anriba ls chupones
Apuis el deixaba figos
I a las bezes teçtones

Apuis la missa de l Galho
Iba-los lhougo a poner
Nas casas de to ls ninos
Que fazien pul merecer

Na manhana de Natal
Lhougo a la purmanhanica
Lhebantában-se mui cedo
A saber de la prendica

L nino Jasus cansaba-se
Porque era pequerrico
Agora ben l Pai Natal
Anriba de sou carrico

La cantiga de la barrila

2009-12-06T19:19:00.002Z

Lhiebo na mano
la mie barrila
i se l’abano
lhougo se scapa
cumo ua anguila.
Ai, ye tan guapa
la mie barrila!

Ten auga sana
i mais fresquica
do qu’onde mana
do que l rigueiro
do que la bica.
Ye un açucreiro
mie barrilica.

Ye ua doçura
sue auga clara
cumo se fura
quando la bebo
beiso que dara.
Sei que me quedo
se la scachara

Ten fino bico
dues guapas alas
qual paixarico.
Pego-le al cuolho
bezes tan ralas
toda m’ancuolho:
- porque nun falas?

You bou a la bica
mie barrila anchir.
Quien mais quier benir?
Nun quiero ir solica.

Chicha, toucino i caldico... cun fuolhas de manjerico

2009-11-07T22:53:00.005Z

− Quien ye que bai a gustar
dun cachico de toucino ?
− Quien ye que bai a gustar
bai a ser abó Catrino !

− I quien ye que bai a gustar
dun cachico de marrana ?
− Quien ye que bai a gustar…
Bás a ser tu, abó Ana !

Mas abó…

Nun ye só de toucino
que gusta abó Catrino !
Mais que l sabor a unto
de l que gusta ye de presunto !

− I tu, miu amor, miu anjico,
quando ye que l comes l caldico ?
Stá tan buono i calentico !
Anda alhá, miu garotico !

− Ai, nó, nó, abó !
Nun l quiero l tou caldico,
até cun fuolhas de manjerico !

Dá-me mas ye un cachico
de pito ou de cordeirico
cun esse sabor, abó Ana,
a fuolhas de hourtelana.

Será mesmo un anjico
para te dar un beisico
tou querido ninico…

Manolico !

O LEÃO E O JAVALI

2009-07-18T23:59:00.003+01:00

L LHION I L COCHINO BRABO

Durante l berano, quando cun l calor aumenta la sede, acudírun a beber a ua fuonte un lhion i un cochino brabo.
Scutírun subre quien deberíe ser l purmeiro a beber, i de la çcusson passórun a ua luta de muorte.
Mas, nun momiento de çcanso, bino ua nubre de abes salbaiges a la spera de algun bencido para l comer.
Anton, pensando bien, dezírun:
- Mais bale que seiamos amigos i nó pasto de ls abutres i de ls cuorbos!

Las lutas einutles sólo sírben para anriquecer i alimentar als sous spetadores.

A ÁGUIA E A RAPOSA

2009-07-10T17:11:00.002+01:00

LA ÁGUILA I LA RAPOSA

Ua águila i ua raposa que éran mui amigas decidírun bibir juntas con la eidea de que esso reforçaríe la sue amisade. Anton l’águila scolhiu ua árbole mui alta para poner alhí ls sous huobos, al miesmo tiempo que la raposa parie ls sous filhos debaixo de uas çarças subre la tierra al pie de la miesma árbole.
Un díe que la raposa saliu a buscar comida, l’águila, que staba chena de fame caiu subre las çarças, lhebou ls raposicos, i eilha i las sues crías regalórun-se cul banquete.
Regressou la raposa i l que mais le custaba era nun se poder bingar.
Cumo podrie eilha, sendo un animal terrestre, sien poder bolar, perseguir a un que bolaba? Tubo que cunformar-se cun l usual cunsolo de ls fracos i ampotentes - maldezir de loinje a la sue agora einemiga.
Mas nun passou muito tiempo para que l’águila recebiera l pago de la sue treiçion contra la amisade. Ancuntrában-se ne l campo uns pastores sacraficando ua cabra; caiu l’águila subre eilha i lhebou ua bíscera que inda cunserbaba fuogo, colocando-la ne l sou niu. Bino un fuorte biento i pegou fuogo a las palhas de l niu i tambien als sous pequeinhos aguiluchos, que inda nun sabíen bolar, ls quales caírun al suolo. Corriu anton la raposa i tranquilamente comiu todos ls aguiluchos, mesmo delantre de ls uolhos de la sue einemiga.

Nunca treiciones la amisade sincera, puis se l fazires, tarde ou cedo de l cielo chegará l castigo.

IR !

2009-07-09T22:32:00.006+01:00

Marília quier ir até la Sicília
Cidália até l’Oustrália
Tomásia até la Ásia
Natércia até la Pérsia
Deolinda até la Índia
Simon até l Japon
Jesé até la Guiné
Anrique até Moçambique…

I you…
(i sei bien quien sou !)
adonde ye que bou
porque para quedar onde stou
nien un teston dou ?!

Bou…
(inda aqui stá quien falou !)

… até Glasgow !

« Go » !

Risa

2009-07-08T17:33:00.002+01:00

Gostarie
de dezir a Marie

que Nuno
ye un rapaç buono

Mas Teresa
que ye mirandesa

sabe que a Elisa
yá le dá la risa… !

ZEUS E OS CARVALHOS

2009-07-07T09:45:00.003+01:00

ZEUS I LS CARBALHOS

Queixában-se ls carbalhos a Zeus nestes modos:
- Nun sabemos para que bemos la luç, pus stamos spuostos, mais que todas las outras árboles, als golpes de ls machados.
- Bos miesmos sodes ls outores de la buossa zgracia, arrespondiu Zeus, se nun dírades la madeira para fabricar ls cabos, las bigas i ls arados, l machado bos respetaríe.

Antes de culpar ls outros de ls nuossos males, miremos antes se nun ls cousamos nós miesmos.

De l que ye que gusta... ?

2009-07-06T23:55:00.008+01:00

De l que ye que gusta…

1.
… Lúcio ?
D’oubir cantar un rabo-rúcio.
… Jaquin ?
De ber bolar un cachachin.
… Marie ?
De quedar cun Paulo to l die.
… i Manel ?
De se casar un die cun Sabel !

2.
... Jesé ?
De passar la tarde ne l café.
... Eiduardo ?
De cantar i trobar cumo un bardo.
... Catrino ?
De tocar fraita i biolino
... i Alfredo ?
De ir a la missa, credo !

N.B. Cumo yá mos splicou nun hai muito tiempo Lápeç de Piedra (Alcides Meirinhos), a esse paxarico que ls Sendineses cháman "cachachin" ls moradores de San Martino dan-le l nome de "mejanguina", palabra que se parece muito por eisemplo cula palabra francesa "mésange" i que ye puls bistos de ourige germánica.

A LEBRE E A RAPOSA

2009-07-05T22:17:00.002+01:00

LA LHIEBRE I LA RAPOSA

Dixo un díe ua lhiebre a ua raposa:
-Podríes dezir-me si realmente ye cierto que sós mui ganaciosa, i porque te cháman la anganhadora?
-Se quieres saber-lo, dixo la raposa, cumbido-te a cenar comigo.
Aceitou la lhiebre i seguiu-la; mas al chegar a casa de la raposa bio que nun habíe mais cena que la miesma lhiebre. Anton dixo la lhiebre:
-Al fin cumprendo para mi desgracia de adonde ben l tou nome: nun ye de ls tous trabalhos, mas de ls tous anganhos!

Nunca le piedas liçones als aldrabones, para nun seres tu l tema de la liçon.

O CÃO E A LEBRE

2009-07-04T08:22:00.002+01:00

L PERRO I LA LHIEBRE

Un perro corrie afanado atrás de ua lhiebre, mas al cabo de ua larga corrida, dou-se por bencido. Un pastor que l biu parar, fazie caçoada del dezindo-le:
-Essa pequeinha ye la melhor corredora de ls dous.
Mas l perro replicou:
-Tu ye que nun bes la çfréncia antre nós. You solo corrie por algo para la cena, mas eilha corrie por la sue bida.

Un maior anteresse dá motibo para un maior sfuorço.

A RAPOSA E AS UVAS

2009-06-29T19:19:00.003+01:00

LA RAPOSA I LAS UBAS

Staba ua raposa cun muita fame, i al ber colgados de ua parreira uas ubas bien galanas, quijo agarrar-las cun la boca.
Mas nun podendo chegar-le, fui-se ambora dezindo:
- Nun préstan, stán tan berdes que nin ls perros las puoden comer!

Nunca pongas la culpa als outros de l que nun sós capaç de fazer.

O LEÃO - O REI BOM

2009-06-27T23:36:00.005+01:00

L LHION - L REI BUONO

Habíe un lhion que nun era ambejoso, nin cruel, nin biolento, mas tratable i justo cumo ua buona creatura, que chegou a ser rei.
Durante l sou reinado fizo-se ua reunion giral de ls animals para se desculpáren i perdonáren-se uns als outros. L lhobo dou la paç al cordeiro, la pantera al camelo, l tigre al corço, la raposa a la lhiebre, etc.
La lhiebre dixo anton:
- Siempre sperei ber chegar este díe, para que ls andebles seiamos respeitados cun justicia por ls mais fuortes.
I lhougo se botou a correr l melhor que puodo.

Quando nun stado se pratica la justicia, ls houmildes púoden bibir tranquilos, mas nun se dében scuidar.

Tintin por tintin

2009-06-02T23:33:00.035+01:00

− Cuntar todo “tintin por tintin“
cumo datrás alguns fazien
darie ua stória sien fin,
nun ye berdade, Custantin ?

− Mira, Ana…
bonda que la cunta dure ua manhana
ou melhor inda : ua sumana,
an Sendin, Miranda ou Bila Chana,
i que la lhéngua bien galana
seia mirandesa, central ou tamien raiana,
sendinesa, se quejires, mas defrente de la de Spanha .

− Mui bien, Custantin.
Mas yá stamos na fin !

− Nó, Ana !
Bemos-mos manhana,

an Bila Chana.

Hai alhá ua fuonte que siempre mana
i mie casa de telha bana

ye ua berdadeira casa trasmuntana !

− Stá bien, Custantin !
Mas lhiebo tamien,
tal i qual cumo Tintin,
l miu perrico Çarafin,
até al chinchin !,
para que nun quede an Sendin,
el solico ! sien alguien !
I sabes esso bien :
houbo mesmo até quien
me l oufreciu ne l San Balantin... !

− Ne l San Balantin ??!!
Mas anton quien ?
Jaquin ? Bajamin ?

− Alguien, Custantin,
Alguien !

− Bien …
Trai anton Çarafin…
Apuis splicas-me todo
tintin por tintin.
I que me dizes tamien
dua biaige a Berlin ?

− A Berlin ??!!

Mas que bien !

I tamien a Pequin !!!

O LAVRADOR E A CEGONHA

2009-05-01T00:35:00.002+01:00

LA CIGUONHA I L LHABRADOR

Un Lhabrador puso rateiras ne l sou terreno acabado de sembrar i caçou ua quantidade de gralhas que beníen a comer las semientes. Mas antre eilhas ancuntraba-se ua ciguonha, la qual habíe partido ua pata na rateira i que rogaba al lhabrador para le cunserbar la vida:
- Rogo-te, labrador – dezíe, - sólo por esta beç. Nun me mates, you nun sou ua gralha, sou ua ciguonha, ua abe de eicelente carátere, i sou mui buona filha. Mira tamien para las mies prumas, que nun son cumo las dessas gralhas.
L lhabrador rindo-se dixo:
- Será todo cumo dizes, mas you sólo sei esto: Cacei-te junto cun estas ladronas, las gralhas, i por tanto morirás junto cun eilhas.

Quien se associa cun un malbado, tenerá l mesmo fin qu’el.

O EMBUSTEIRO

2009-04-05T15:40:00.006+01:00

L AMBUSTEIRO

Un home doliente i de poucos haberes prometiu a ls diuses, sacraficar-les cien buis se l salbássen de la muerte. Querendo poner a la proba l doliente, ls diuses ajudórun-lo a recubrar la salude, i l home lhebantou-se de la cama. Mas cumo nun tenie ls cien buis, fizo-los cun sebo i lhebou-los a sacraficar a un altar, dezindo:
-Eiquí teneis, oh diuses, la mi oufrenda!
Ls diuses decedírun tambien anganhar l ambusteiro, i mandórun-le un suonho que l mandaba deregir-se a la borda de l mar, adonde ancuntrarie mil monedas de prata.
Nun podendo contener la sue alegrie, l home corriu a la praia, mas alhí caiu en las manos de uns piratas que lhougo l bendírun. I fui assí que ancuntrou las mil monedas de prata.

Quien trata de anganhar, acaba anganhado.

L LHION I L BOIEIRO

2009-03-23T17:09:00.005Z

Un boieiro que apacentaba ua buiada perdiu un bitelo. Buscou-lo, por ls alredores sien l’ancuntrar. Anton pormetiu-le a Zeus sacreficar-le un chibo se çcrubrisse quien l habie roubado.
Antrou nun matagal i biu un lhion quemendo l bitelo. Lhebantou assustado las manos al cielo gritando:
- Oh grandioso Zeus, antes pormeti sacreficar-te un chibo se ancontrasse l lhadron; mas agora pormeto-te sacreficar un bui se nun me deixares caer nas garras de l lhadron !

Quando percurares ua soluçon, ten presente que al ancuntrar-la, esta por su beç puode cumbertir-se noutro porblema maior.

LA ÁGUILA DE ALA CORTADA I LA RAPOSA

2009-03-20T09:56:00.003Z

Cierto die un home caçou ua águila, cortou-le las alas i soltou-la ne l curral junto cun las sues pitas. Pesarosa, l’águila, que fuora poderosa, amarraba la cabeça i passaba sien quemer: sentie-se cumo una raínha ancarcelada.
Passou outro home que la biu, agradou-se deilha i decediu cumpra-la. Arrincou-le las prumas cortadas i deixou-se-las crecer de nuobo. La águila, mal se biu cun las sues alas, alhebantou bolo i acaçou ua lhiebre para se la lhebar, en agradecimiento, al sou lhibertador.
Biu-la ua raposa i ampeçou a acunselha-la para mal deziendo-le:
- Nun le lhiebes la lhiebre al que te lhibertou, lhieba-la antes al que te acaçou; puis l que te lhibertou ya ye bueno sien agradecimiento. Percura antes agradar al outro, nun baia apanhar-te de nuobo i te corte, por i, las alas outra beç.-

Trata siempre cun respeito a tous bienfeitores, i por coutela manten-te loinje de ls malbados que dízen fazer l que ye melhor por cumenéncia.

LA ÁGUILA I L SCARABEILHO

2009-03-18T22:23:00.005Z

Staba ua lhiebre sendo perseguida por ua águila, i bendo-se perdida pediu ajuda a un scarabeilho, para que la salbara. L scarabeilho pediu a la águila que perdonara a la sue amiga. Mas la águila, çpreziando la ansegnificancia de l scarabeilho, comiu la lhiebre na sue preséncia.
Zde anton, buscando bingar-se, l scarabeilho ouserbaba ls lhugares adonde la águila ponie sous uobos, i fazendo-los rodar, atiraba-los abaixo.
Bendo-se la águila scamugida de l lhugar para adonde quiera que fuora, recurriu a Zeus pedindo-le un lhugar seguro para poner ls sous uobos. Zeus oufreciu-le que ls ponisse ne l sou regaço, mas l scarabeilho, bendo la tática scapatória, fizo una bolica de barro, bolou i deixou-la caer subre el regaço de Zeus. Este lhebantou-se para sacudir aqueilha sujidade, i deitou por tierra ls uobos sin dar de cuonta.
Zde anton, las águilas nun pónen uobos ne l tiempo an que sálen a bolar ls scarabeilhos.

Nunca çprézies l que parece ansigneficante, puis nun hai ser tan fraco que nun puoda fazer-te danho.

O PASTOR A ÁGUIA E O CORVO

2009-03-14T10:27:00.006Z

L cuorbo

Botando-se zde l cielo, ua águila agarrou un cordeirico.
Un cuorbo biu i tratando de eimitar la águila, botou-se subre un carneiro, mas cun tan mal coincimento dessa arte, que las sues garras se anredórun na lhana, i nien mesmo batendo las sues alas cun toda la fuorça cunseguiu soltar-se.
L pastor bendo l que sucedíe, caçou l cuorbo, i cortando-le las puntas de las alas para que nun bolasse, lhebou-lo als sous ninos.
Preguntórun-le ls sous filhos que classe de abe era aqueilha, i dixo-les:
- Para mí, sólo ye un cuorbo; mas el, cuidaba que era ua águila.

Pon tou çfuorço i dedicaçon para l que realmente stás porparado, nó ne l que nun sabes.

L BUI I L RATO

2009-03-09T11:03:00.006Z

Un bui fui mordido por un rato i anraibado por la mordedura, tentou caçar l rato. Mas l rato lhougo achou un buraco, onde se scunder.

Anque l bui tenga scabado las paredes con sous cuornos, cansou-se antes que pudiera agarrar l rato, i ponéndo-se de zinolhos, quedou-se a drumir an pie de l buraco.

L rato assomou -se, saliu debagarico, mordiu-lo outra beç, i tornou pal buraco. L bui alebantou-se, i nun sabendo que fazer, quedou mui tristico.

Anton l rato dixo: -Ls grandes nin siempre gánhan. Hai momentos an que ls pequeinhos i houmildes son ls mais fuortes para fazer sus açones.

Nunca çprezes l valor de ls pequeinhos.

(Fábula de ESOPO)

La formiga d'ala i la formiga furona

2009-03-08T20:05:00.004Z

Pintura digital de manuol Bandarra

Staba ua formiga d’ala

a caçuar dua prima

que passaba l die anteiro

a scabar ua ancha sala

i a fazer mui grande rima

al redor de l formigueiro:

- Cuitada de ti, tan triste

ye tue bida a trabalhar

nesses tunes que sfuracas!

Cousa mais guapa yá biste

do que l miu alto bolar

muito por riba las bacas?

I la formiga furona

mui triste cula sue sina

inda mais triste quedaba

cun aqueilha figurona

que nun mexie ua china

i cun nada se relaba.

La formiga d’ala un die

staba an riba dun palhaço

culas sues alas tan chena

que nien biu quien la comie

s’un bichá ó un picanço.

Bendo esto, mui serena,

fui la formiga furona

a correr pa l sou buraco

dezindo cun sues maleitas:

cumo bai la figurona

bolar an tan scuro saco?

Nun hai formigas purfeitas!

Fracisco Niebro

LA NINA

2009-03-01T00:18:00.004Z

L die staba cralo

L die staba cralo,
L monte cheno de froles;
Los paxaricos cantában
Las sues cantigas d’amores.

La nina apanhaba froles,
I arranjaba sous ramicos,
I cantaba sues cantigas
A par de los paxaricos.

(Francisco Meirinhos – abade de Ablanoso i natural de San Martino)

La nina apanhaba froles

Fui este anho, ne l Berano...

2009-02-18T22:13:00.010Z

Até ls anjos tócan música… la gaita por eisemplo !
(Fresco çcubierto an 1947, an Fráncia, ne l departamiento de Haute-Loire, an Blassac, nua eigreija gótica de ls seclos XIII i XIV)

Fui este anho,
ne l Berano,
a Zenízio.
Un paraíso !

Mas purmeiro...
Fui até esse paradeiro
que ye la Quinta de Cordeiro.
Staba alhá un gaiteiro
que achei bien porreiro !

De l que gusto…,
dixo-me el,

Ye quando a la mi gaita
se junta l bombo,
la fraita, la caixa
i la pandeireta.

I que las rapazas,
todas admiradas,
Ai las rapazas !,
scúitan i sónhan
i nun resísten tamien an beilar...

I you...
Bota a tocar !

Decumiento sien andicaçon de l outor i de la era eisata mas cul seguinte títalo : « Ls anstrumientos na Eidade Média (antre ls quales la gaita) inda ousados ne l seclo XIX na música tradecional » ; decumiento ancuntrado neste sítio francés subre anstrumientos tradecionales ousados na Probença, Sul de la França. www.zictrad.free.fr/.../Cours/instruments.htm

N.B. Gustei destas dues eimages mas para bien dezir tamien tenerie gustado eilustrar este miu poema mirandés cun retratos tirados nas tierras de Miranda... retratos de gaiteiros i de rapazas mirandesas. Un die, spero bien que si.

Las biaiges dua folhica

2009-01-25T17:12:00.002Z

Folhicas que yá fazírun la sue biaige [Retrato de Carlos Ferreira]

Era ua fuolha arrincada
por ua tal rabanada
que bolaba,
rodaba,
beilaba,
mas nun s’assustaba.

L aire assopraba por baixo
i chubie cumo un páixaro
a ua nubre
que l’ancubre
i nun çcubre
adonde se chube.

L aire assopraba po riba
i nun bie por adonde iba,
a rodar,
a gritar,
a chorar:
Ai! Bou-me a matar!

Mas la fuolha era lebica,
parecie ua prumica:
aparaba,
aterraba,
i çcansaba
se naide la pisaba.

Fracisco Niebro

SARSAFATE - jogo de scundidas

2009-01-23T17:43:00.006Z

Este era un jogo de scundidas an que ls garotos se ponien todos an fileira, de pies, ancostados a la parede i l mestre ampeçaba pula squierda batendo-le na cabeça:

Sarsafate fui al mar,
A buscar la rainha,
Para l filho de l Luiç,
Que stá preso pul nariç.
Ls cabalhos a correr,
Las ninas a aprender,
Qual será l mais guapo
Que s’eirá scunder,
Raza, razon,
Farelos a meio teçton.

I l último bai-se a scunder

Ne l fin l último que queda ten que adebinar adonde stan ls outros, senó ten que ls traer a las cuostas.

Deixai passar la banda !

2009-01-23T14:27:00.009Z

Bien sei quien manda,
an Miranda :
Fernanda mas tamien Armanda.
Deixai passar la banda !

I quien decide, an Sendin:
Balentin i Bajamin...
Mas tamien, sei esso bien:
L miu perrico Çarafin* !

Este chama-se Rantanplan, pul menos nas bersones an francés
de las bandas zenhadas an que l heirói ye un cow-boy chamado Lucky Luke...

* An tiempos, quando miu pai era garoto an Sendin, ne ls anhos quarenta i cinquenta, tenie, el mais l sou armano Abílio dous anhos mais bielho, un perrico chamado Çarafin, “spierto que you sei alhá !”, subretodo para caçar lhiebres i coneilhos, até nas arribas de l Douro, i de que oubi falar mais dua beç, até an França... Se soubisse que inda hai hoije decendientes desse Çarafin nessas aldés i tierras de Miranda, inda era capaç de me deixar catibar you tamien ! Quien sabe ?!
Se un die me calhar tener un perrico, tenerá que se chamar Çarafin !

Anzonas

2009-01-15T22:12:00.006Z

abion de papel

Ua corrida, un poulo, ua lapada
de papel : eilusion que bolaba
alto, baixo, plainaba. Aterraba
ua beç, dues, binte, cinquenta.
Alantre i atrás andaba
ua criança antretebida. Cuntenta.
Çtraída. Anzonada.

Bi un cachachin, nun jardin...

2009-01-15T20:42:00.017Z

Retrato de Carlos Ferreira, Sendin 2008.
Hai bárias maneiras de caçar páixaros: un cachachin, por eisemplo !

- Bi un cachachin,
nun jardin,
an Sendin …

- Mas que bien!
You tamien,
á Juquin !

- Un paçpalhaç
Que sabe bien l que faç…

- Ah, rapaç !
De l que you nun sou tamien capaç !

- I un stornino,
ne l camino pa San Martino,
guapo cumo un nino ….

- Nun sabe el qual puode ser l sou çtino!
Nun ye berdade, Diamantino ?!

Todos esses paixaricos
Son cumo bós, mius filhicos !,
Cuntina a dezir la raposa,
Gústan de lhibardade
Mas tórnan siempre al niu
Quando hai necidade
I ls atormenta l friu…

Ah, tiu !
L que nun bal un niu !
Só quien biu !

Retrato ancuntrado na anternete i a perpósito de l qual nun sei quien ye l outor. Mas se alguien tubir un retrato tamien cumo este cun ua raposa i ls sous raposicos ou se sentir anspirado ou tubir tamien eideias, que mos abise ! Melhor inda se fússen esses animalicos tamien mirandeses, anton nun ye berdade ?!

L LIBRO DA TILA

2009-01-09T18:39:00.003Z

Rapazicas a ler " L libro da Tila "
de Matilde Rosa Araujo

BALADA DE LAS BINTE RAPAZICAS FRIURENTAS

Binte rapazicas, nó mais,
You bie eilhi ne l beiral:
Tenien cabecica negra
I branquito l'abental.

Binte rapazicas, nó mais,
You bie naquel muro:
Tenien cabecica negra,
Bestidico azul scuro.

Las mies binte rapazicas,
Capicas dezindo adius,
Chegórun na Primabera
I acenhórun d'al pie dius.

Las mies binte rapazicas
Drumien calientes nun niu
Feito d'amor i de tierra ,
De lhama i carino era l feitiu.

Las mies binte rapazicas
Pa l almuorço i l jantar
Tenien cousas pequerricas,
Que apanhában pul aire.

Yá passou la Primabera
Sues horas pequerricas:
I houbo un milagre ne ls nius.
Puis fúrun mais, las rapazicas!

Éran uobos redundicos
Que daba gana beisar:
Uobos adonde habie bidas
I alicas para bolar.

Yá nun son binte rapazicas
Que la lhuç de l Sol acalenta.
Son muitas mais! muitas mais!
Nun son binte, son uitenta!

Despuis uitenta rapazicas
You bie eilhi ne l beiral:
Tenien cabecica negra
I branquito l'abental.

Mas las uitenta rapazicas,
Capicas dezindo adius,
An cierto die de Outonho
Perdírun-se alhá puls cielos.

L SOL

2008-12-27T11:43:00.003Z

L SOL

L Sol ye luç.
L Sol ye calor.
Ye bater de coraçon.
L Sol ye amor...

Las castanhas, este anho...

2008-12-25T16:30:00.015Z

Retrato de Carlos Ferreira, Sendin, Nobembre de 2008.

Las castanhas,
este anho,
son cumo to ls anhos:
son castanhas !

Ou cumo ye que queriedes que fússen?

Burmeilhas
cumo ls lábios deilhas…?

Amarielhas
cumo las patrielhas…?

Calientes
cumo las serpientes…?

Nó!
Solo castanhas !
Mas cumo to ls anhos,
pa calcer i tornar felizes,
tanto grandes
cumo petizes !

N.B. Se calha la palabra “petizes” nun ye bien mirandesa. Ye pertuesa, cumo todos sabeis, mas lhembra tamien l francés “petit(s)” i you cumo sou tamien francesa…

Castanhas speciales para dies de fiesta

cumo l Natal i la Passaige d’Anho...

CHOCOLATE DE NATAL

2008-12-25T00:17:00.001Z

L Choclate de Natal

Oulá, you naci nua manhana de Dezembre. Tenie l feitiu de un Pai Natal i apercebi-me lougo que l Natal staba a chegar. Nua carrinha lebórun-me para un supremercado, onde me ponírun nua parteleira al pie de ls choclates eiguales a mi. Ua nina, que se chamaba Sara, pegou an mi i lebou-me para sue casa. Comiu-me na nuite de Natal cun ls sous amigos e amigas... I assi fui la mi bida, la bida que qualquiera choclate puode tener.

Catarina 9 anhos

COUSAS DE BELZEBU

2008-12-04T23:31:00.005Z

BELZEBU

Ah,tu!
Cousas de Belzebu.
Iba pula rue.
Ua baca fizo mu
I dou un pu.
Ah,tu!
Cousas de belzebu…

Stá a nebar i a gilar !

2008-11-28T20:46:00.004Z

Nun salgas pa la rue
Que stá a nebar i a gilar
I la raposa a cantar
Comendo anteiro un peru… !

Un zebu i un zulu !
Un canguru i un tatu… !

Ah, tu !

Quien quejir saber mais subre este filme rodado an francés (La raposa i la criança), puode ir a ber l site oufecial de l filme : http://www.lerenardetlenfant.com/ cun bídeos, resumos i eimages mui mui guapas.

JOGO DAS ESCONDIDAS

2008-11-22T22:00:00.002Z

Run, run...

Run,run!
Quicarabonda,
Sala maronda,
Felipe s'isconda!...

BARRE... BARRE... VASSOURINHA

2008-11-20T02:42:00.006Z

BARRE... BARRE... BASSOURICA.

Barre,barre bassourica.
Se barrires bem,
Dou-te un Bintém.
Se barrires mal,
Dou-te un real.

Salta pulga na balancia,
Dá un supiro
I pon-te an Francia.

Ye l jogo de las scundidas!...

Naquel jacarandá...

2008-11-17T22:32:00.018Z

- Naquel jacarandá,
quien cantará,
al Dius-dará,
yá quantá:
un bichá
ou un sabiá ?

- Bá! I quien saberá ?!
Alá ?
Ouxalá ?
Iemanjá ?
Á Obama…

- “Yeah”!
Ne l Pará,
Ceará,
Alabama,
i mais outros sítios que you sei alhá !

- Ah !
« Saravá » !

N.B. Oulá !

1. « Yeah » corresponde a « yes » (si) ne l anglés falado.
2. « Saravá ! » segnefica « Biba ! » ne ls rituales de ourige africana ne l Nordeste de l Brasil.

3. « Iemanjá, reina de l mar, ye tamien cunhecida por dona Janaína, Inaé, Princesa de Aiocá i Maria, ne l paralelismo cula relegion católica. Aiocá ye l reino de las tierras misteriosas de la felcidade i de la lhibardade, eimage de las tierras natales de la África, suidades de ls dies lhibres na floresta. », Jorge Amado.

ONDE ESTÁS ?

2008-11-14T23:55:00.005Z

ADONDE STÁS ?

Este era un jogo que se fazie muito i que serie un modo de eisercitar ls garotos. Ponien-se dous garotos cuostas cun cuostas, apuis un amarraba-se para l outro quedar an riba i ampeçaba un diálago antre eilhes. Perguntaba l que quedaba por baixo:

- Adonde stás?
- An gametas.
- Darás deilhas?
- Darei, darei…
-Pon-te alhá q’you çcansarei.

I íban trocando de posiçones até aguantáren.

JOGOS - 1

2008-11-04T16:34:00.004Z

Acustados a ua parede, ls garotos scónden las manos, anquanto un bai batendo nas cuostas deilhes i dezindo:

Da cá essa manita!...
Comiu-la la gatica!...
Da cá essa manota!...
Comiu-la la gatoca!...

Diç las bezes que fúrun percisas até passar por todos ua beç i cuntina até acabar ls bersos.
Onde acabar, este ten que lhebar a las cuostas l que stá antes, que pon a la mostra un númaro de dedos i que l bai perguntando quantos son, solo acaba de l lhebar quando acertar.

Barre, barre, bardeirico !

2008-10-30T22:28:00.050Z

Retratos de Carlos Ferreira, Sendin, Feira de ls Grazes, Outubre de 2008

Todos ls anhos an Sendin, na feira anual de l Grazes que ye questume fazer-se na fin de l més de Outubre, tradecionalmente ne l die 30 anque este anho la data tubisse passado a ser na redadeira fin de sumana de l més, hai giente que ben a amostrar burricos mui bien purparados i albardados, alguns deilhes cun alforjas chenas de bardeiros, uns feitos cun milho, outros cun galhicos de gingeira, cumo puoden ber nestes trés retratos que fúrun tirados por Carlos Ferreira, sendinés cumo you, na praça, delantre de la eigreija.
Ye un acuntecimiento essa feira anual: ye ralo ber hoije an die tantos burricos na praça de la nuossa bila, assi tan bien purparados. Ye cumo se fusse die de fiesta para eilhes !

Mas falemos tamien de ls "bardeiros" que siempre serbírun i inda sírben para barrer las prieças de casa ou até las rues; tamien se diç "baleios" i sírben para "baliar", dues palabras que se parécen muito cun "balai" i "balayer", dambas dues francesas, cun sentido eiquibaliente a essas dues de l Mirandés. L que amostra bien que la çtáncia que puode haber antre las lhénguas ye por bezes menos grande que l que un pensa.

Mas l que ye que le podemos dezir a esses bardeiros sendineses ou até mirandeses, a cada un deilhes ?

Quien sabe até se un nun mos bai a respunder...

- “Barre, barre,
Bardeirico!

Se barres bien
Bás pa Sendin.

Se barres mal
Bás pa l Seixal !”

- “Nó, nó!, diç l bardeirico,

nas alforjas dun burrico,

L que me bal

Ye l Barrocal ,

L Rosal

I l Çaramal .

Mas tamien este animal
Que nun lhieba nada a mal
I beila siempre ne l arraial,
De l Anho Nuobo al Natal.

Todo esto ye normal,
Nesta aldé de Pertual !
Dai-me anton un rial
Porque bien sei l que bal !”

N.B. L Barrocal, l Rosal i l Çaramal son chamadeiros de l termo de Sendin cumo talbeç de outros lhugares de las tierras de Miranda i tamien de Pertual.

Arble-Naranjeira

2008-10-22T11:56:00.005+01:00

Quiero dezir-bos que nun fui an Zenízio que you coinci esta arble, la sue frol i l sou fruito.
Nun las habie, nien sei s’agora las hai. Cumequiera nó. Cuido que ten haber cul sítio, aqueilha tierra ye mui praina, sien sierros nien lhadeiras para haber fundeiros adonde haba amornadeiros queilhas gústan muito. Debe ser ua arble que quier muitos mimos de l tiempo, l termo de Zenízio ye bentaneiro.
Digo you.
Mas you coinci-las, mie abó de las saias, Flesbina, ouferecemos muitos fruitos, nun sei cumo fazie, mas de beç anquando alhá benien naranjas.
Miu pai tubo ua baca que le chamaba naranja.

La fiesta de l caracol

2008-10-20T01:43:00.003+01:00

Pintura birtual de Manuol Bandarra

Bai ua fiesta d’arromba
pula aldé de ls caracoles
uns jógan a ber quien zomba
outros cómen uobos moles

hai un que toca la gaita
outro caixa culs cornicos
ua lezma toca fraita
las conchas son ls bumbicos

todos gústan de beilar
la balsa i l repasseado
apuis pónen-se a cantar
anriba dun trabiado

l caracol fogueteiro
bota çcargas fuogo preso
siempre ampeça cun morteiro
i ten l lhume siempre aceso

ye meia nuite passada
quando ampeça l rock an roll
música mui anjeitada
pa l beilar dun caracol

d’hora an hora todo para
a comer mui buns manjares
uns colgados dua bara
outros presos an guelhares

mas l melhor de la fiesta
son las belozes corridas
ténen todos tanta priessa
qu’hai siempre falsas partidas

Ye solo a la purmanhana
ye solo al rumper de l sol
que s’acaba tan galana
festica de l caracol.

L RIU

2008-10-13T13:25:00.004+01:00

L RIU

L riu

-"Tenes friu? Bai al riu,

Q'alhá stá tou tíu.

Cun la manta cagada

I l culo al friu..."

Tic, Tac

2008-09-08T23:10:00.006+01:00

Sfregando l reloijo

Diç l tiempo al reloijo:
- Á reloijo nun me cortes, nun me cortes cun tue sierra tan afilada. Ten pena de mi.
- Perdona, mas ten que ser. Ten que ser assi.
- Mas porque ye que ten que ser assi? Assi an segundos? Porque ye que me cortas tan delgadico?
- Isso ye que nun sei. Se calha ye para fazer caldo de berças.

Adaptado de Mário Castrim no sou lhibro Histórias com Juízo

L lhobico que perdiu la mai

2008-07-23T12:05:00.003+01:00

Pintura birtual de Manuol Bandarra

Ua beç un lohbico
andaba solico
todo perdidico
nun cierto adilico.

Perdiu la sue mai
matórun-le l pai
agora diç, ai!
Para adonde bai?

Ye tan pequerrico
galano, fofico
cumo un nobelhico,
cumo un cordeirico.

Bamos a pensar:
cumo l ajudar,
para nun chorar
i sue mai achar?

LA STÓRIA DE JUAN CATRINO (2)

2008-07-17T10:23:00.006+01:00

( cuntinaçon )

Alhi ua temporada,
Trouxe-lo siempre ne l sentido.
Passado un pouco de tiempo
Yá todo se me habie squecido.

Apuis deixaba las bacas,
An muitas de las oucasiones,
Iba por aqueilhas tierras,
Solo a roubar melones.

You roubaba melones
Roubaba fusse el a quien.
Passado un pouco de tiempo,
Caros melones me salien.

Anton a la mie selombra
Quantos éran que roubában?
Mas solo Juan Catrino,
Todos melones pagaba.

LA STÓRIA DE JUAN CATRINO

2008-07-14T23:04:00.004+01:00

LA STÓRIA DE JUAN CATRINO

Quando you era pequeinho,
Diç anhos tenerie,
Nunca me quijo squecer,
L que me passou un die.

Miu pai mandou-me,
Cun las bacas pal prado.
Anjoldei-me cun rapaç
I deixei l portilho stapado.

Bin para casa a la tarde,
Sin saber mais de las bacas
I a la spuosta de l Sol,
Lhebei ua de las tales casacas.

Dezie mie mai para miu pai,
Mira que tu matas l filho,
Mas el que arrespondiu?
Que las bacas habien comido l milho.

Tornou a dezir mie mai,
Mira que tu matas l rapaç,
Mas el que arrespondiu?
Ye para ber se outra nun faç.

Porradas i mais porradas,
An riba de l miu cuorpo,
Miu pai quando me deixou,
You yá staba cumo muorto.

(cuntina)

L rei sol

2008-07-03T23:11:00.008+01:00

Nace no cielo çcampado
antre montes ou praineiras
i mesmo que steia anubrado
fai apagar las candeias.

Ye l rei, l senhor que manten
las árboles berdes, lampion que susten
la bida na tierra, ne l mar
to los dies siempre siempre a alumiar.

Stá ne l meio. Alredor son
uito bolas a las buoltas antre el i Pluton:
Marcúrio, Bénus, Tierra, Marte,
por séren de drento quédan a la parte;

Júpiter l maior, anielhos an Saturno;
corres tamien las hai an Urano i an Neptuno.
Más las lhunas a brilhar,
meteoros, cometas a relhampar.

Esto todo junto ye l Sistema Solar.

La nubre sin pies

2008-06-25T02:16:00.003+01:00

Zeinho digital de Manuol Bandarra

Era ua nubre pequeinha
que parecie ua gota,
solo cabeça sin pies.
Sentou-se un die nua peinha
para calçar ua bota
i al aire dar cuntapies.

Squeciu-se de que era feita:
ua auga tan pura i lhimpa
que lhuzie cumo un cristal
i, al lhebantar-se bien dreita,
çfizo-se cun ua chimpa,
quedou na peinha un sinal.

Moda de arrolhar monhecras probes

2008-06-23T22:25:00.003+01:00

Nina de ls uolhos doces
Drume-te al miu cantar:
Tengo nina de trapos,
Tengo ua boç de lhunar…

Ls mius braços son la Lhuna,
Quando eilha ye quarto creciente:
Drume-te nina de trapos,
Miu cachico de giente.

Drume-te mie filha triste,
Miu farrapo de nina,
Drume, que you sou la nubre
Que te sirbe de cortina.

Nina de ls uolhos doces
Drume-te al miu cantar:
Tengo nina de trapos,
Tengo ua boç de lhunar…

(Traduzi-la de l lhibro O Livro da Tila de Matilde Rosa Araujo)

LHIBRO

2008-06-20T10:30:00.003+01:00

Querie fazer un pedido a todos ls que scíben eiqui ou bénen a ler.
Se quereis fazer algo por la nuossa lhéngua, cumprai este lhibro i dai-lo a un nino ou nina de l praino.

Ye la stória de Sabel i de l rapaç de l praino. Ye la stória de ua bida que hai que guardar. Ye un manantial de ansinamientos. Ye lhiteratura mirandesa de l melhor que hai.

AMOR

2008-06-18T01:14:00.003+01:00

Amor

Mai, las froles drúmen
Quando se pon l Sol!

Filha, para las drumir
Canta l reixenol...

Mai, las froles spértan
Quando nace l die!

Filha, para las spertar
Canta la cotobie…

Mai, gustaba tanto de ser ua frol!
Filha, you anton serie ua abe…

(traduzi-la de l libro de bersos, TILA, de Matilde Rosa Araujo)
Este i l de Sophia de Mello Breyner, A menina do mar, éran oubrigatórios na mie sala, quando ansinaba ls garoticos.

L anielho de Manel

2008-06-13T15:03:00.027+01:00

Anielho... anielhos... cumo este ne l tal “Senhor de ls Anielhos”... ?

- L anielho de Manel,
coronel an Eisrael,
i que ye de papel i de cordel
ye para Daniel,

Samuel,

Miguel,

Gabriel,

Lionel,
ou...

Abel ?

- El !

- El ?

- Manel !

- I quien sabe del ?

- Só el...

Mas tamien Sabel
Que lhaba burel
Que tamien ye del

Alhi ne l Bergel !

N.B. L Bergel ye un sítio que queda mui acerca de la pobaçon de Sendin, yá ne l termo, indo a caras al riu. Ye un lhugar adonde hai muitas huortas mas tamien muita auga i tanques adonde zde que se me lhembra siempre se lhabórun canastras i canastras de roupa de quaije Sendin anteiro. Lhabar roupa siempre fui mais ou menos ua atebidade reserbada a las mulhieres. Cun ou sien anielhos eilhas tamien ?

An Abril augas mil !

2008-06-12T23:42:00.017+01:00

Lhieba anton esse candil
Esse mandil i esse funil
Pa’l tou nial i l tou adil
Que tenes alhá ne l tou Brasil.

l bolo de l beiso

La fantasie de l Natal

Un diospiro

**** A las onze ****

L STUDANTE

Para matar la fame... i tamien la sede

EITERNAMENTE MAI

Quadras Als Santos Populares

Poesie amerosa

Roques

Grima !

LAS BAQUITAS MIRANDESAS

L carro cun patas

L squilo i l crocodilo

UN SQUILO

L peru

SIN MIEDO DE SER FELIÇ

La baca Paca

Paixarico, rico-rico

L baso de las palabras

Tamien you querie

Ua bida de margarida

TRÉS BIBAS AL SPEILHO

Un bichá que bebie xá !

UA ROSA NE L MIU JARDIN

Un die, un die, un die…!

sabiá

Adonde stá l bichá?

Poluiçon

Catibar

UA ROSA YE UN SUONHO

Fui assi

ADEBINHAS

LS MINTIROSOS

BUONAS FIESTAS

LA CANHONA MUORTA

La lhebrica na nebada

LA MAGOA DE LA RITA

CAÇADA EIMAGINADA

L gato Farruscas

Bi ua rosa a nacer

L jogo de la scundelina

La monica Amélie

Nun quiero que el ouba

Analfabeto

Hai uns anhos

La cantiga de la barrila

Chicha, toucino i caldico... cun fuolhas de manjerico

O LEÃO E O JAVALI

A ÁGUIA E A RAPOSA

IR !

Risa

ZEUS E OS CARVALHOS

De l que ye que gusta... ?

A LEBRE E A RAPOSA

O CÃO E A LEBRE

A RAPOSA E AS UVAS

O LEÃO - O REI BOM

Tintin por tintin

O LAVRADOR E A CEGONHA

O EMBUSTEIRO

L LHION I L BOIEIRO

LA ÁGUILA DE ALA CORTADA I LA RAPOSA

LA ÁGUILA I L SCARABEILHO

O PASTOR A ÁGUIA E O CORVO

L BUI I L RATO

La formiga d'ala i la formiga furona

LA NINA

Fui este anho, ne l Berano...

Las biaiges dua folhica

SARSAFATE - jogo de scundidas

Deixai passar la banda !

Anzonas

Bi un cachachin, nun jardin...

L LIBRO DA TILA

L SOL

Las castanhas, este anho...

CHOCOLATE DE NATAL

COUSAS DE BELZEBU

Stá a nebar i a gilar !

A las onze