Pintura digital de Manuol Bandarra
Era ua frol tan galana
que ua abeilha
pousou neilha,
lhougo a la purmanhana.
- Mas que bun zayuno achei!
Diç-me frol,
cumo l sol,
cun quanto te pagarei?
- Lhieba-me un beiso acolhá,
al boton
tan pimpon,
que sola nun chego alhá!
Fracisco Niebro (2001)
6 comentários:
bbbbbbbbbbbbbbbbbbbb............. !
B... cumo Bolo, Beiso, Boton, Bee (abeilha an anglés), bolar i tamien Bandarra...!
Este Blob só puode ser...
Buono, Buono, Buono... !
Biba !
Buonas nuites Ana,
Fuste la purmeira a poner un comentairo neste blogue. Bienbenida i oubrigado pula cumpanhie i pula fuorça.
Nun quieres benir pa la quadrilha?
Puode ser que te deia la gana de traduzir algo de algun outor francés para ls nuossos garoticos, ou anton oureginal, de tue outorie. Quien ten filhos, cumo tu, siempre houbo un tiempo an que se tornou cuntador de cuntas.
Caro Fracisco Niebro,
Agradeço l sou cumbite cun muito gusto. Bamos a ber antretanto se ancontro algua anspiraçon you tamien para screbir testos que agráden als mais pequeinhos…
Mas l que puodo dezir para yá ye que quedei agradablemente surprendida: este site ye cumo un lhibro que you de pequeinha tenerie adorado folhear, ler i çcubrir. Ls mius filhos, anque yá adolecentes agora, tamien tenerien gostado, tengo la certeza, i inda hoije será l caso.
La poesie que eisiste ne ls testos cumo tamien na pintura i na Arte nun ten eidade i ye ounibersal.
Quien nun gustarie de tenes cousicas guapas quando era pequerrico? Íbamos al Carro de la Gulbenkian, mas nada habie an mirandés. Solo spero que estes fruitos nun béngan cumpletamente fuora de tiempo.
Quedo cuntento por aceitares l cumbite an te ajuntares a esta Jolda an quien tengo muita fé para fazer cousas guapas.
You nun cheguei a cunhecer ls carros de la Gulbenkian, sabe, caro Fracisco Niebro. Fumos-mos pa la França antes. Mas mais tarde, la bida a cierta altura dou-me la ouportunidade de chegar a trabalhar para essa anstituiçon an Paris ne l meio de muitos lhibros antre ls quales uns que éran raros i antigos i habien sido cumprados ou adquiridos pul próprio Calouste Gulbenkian...
Talbeç tamien scriba algo un die subre essas pequeinhas etapas de la mie bida.
Si, Ana, ls carros de la Gulbenkian fúrun mui amportantes para mi, i para mais giente. You screbi essa mie spriença ne l miu lhibrico de cuontas Las Cuontas de Tiu Jouquin, nua cuonta chamada «Un cierto cheiro a doces».
Benga anton essa spriença cula Gulbenkian.
Enviar um comentário